নিৰাপত্তাৰক্ষীৰ সংঘৰ্ষত নিহত ২জন সন্ত্ৰাসবাদী; ৪ সেনা জোৱানৰ লগতে এজন শীৰ্ষ আৰক্ষী বিষয়া আহত
জম্মু-কাশ্মীৰৰ কুলগাম জিলাত শনিবাৰে নিৰাপত্তাৰক্ষী আৰু সন্ত্ৰাসবাদীৰ মাজত হোৱা সংঘৰ্ষত দুজন উগ্ৰপন্থী নিহত হয়। এই এনকাউণ্টাৰত জম্মু-কাশ্মীৰ আৰক্ষীৰ এজন বিষয়াৰ লগতে পাঁচগৰাকী সুৰক্ষাকৰ্মী আহত হয় বুলি জানিব পৰা গৈছে।
এই সংঘৰ্ষ কুলগামৰ আদিগাম অঞ্চলত হোৱা বুলি জানিবলৈ দিয়ে প্ৰশাসনে।
আৰক্ষীয়ো জনোৱা অনুসৰি, নিৰ্ভৰযোগ্য সূত্ৰৰ পৰা লাভ কৰা তথ্যৰ পিছতে অঞ্চলটোত সেনা, আৰক্ষী আৰু চি আৰ পি এফৰ এটা দলে আদিগাম গাঁৱত তালাচী অভিযান আৰম্ভ কৰে। নিৰাপত্তাৰক্ষীৰ উপস্থিতিৰ কথা জানিব পাৰি আত্মগোপন কৰি থকা সন্ত্ৰাসবাদীয়ে গুলীবৰ্ষণ আৰম্ভ কৰে।
দুয়ো পক্ষৰ মাজত চলা গুলীয়াগুলীত দুজন সন্ত্ৰাসবাদী নিহত হোৱাৰ লগতে জম্মু-কাশ্মীৰ আৰক্ষীৰ এগৰাকী অতিৰিক্ত আৰক্ষী অধীক্ষকৰ লগতে সেনাৰ চাৰিজন জোৱান সাধাৰণভাৱে আঘাতপ্ৰাপ্ত হয়।
উল্লেখ্য যে, বিগত তিনি-চাৰি মাহৰ ভিতৰত জম্মু সংমণ্ডলৰ ডোডা, কথুৱা, ৰাজৌৰী, পুঞ্চ আৰু ৰিয়াছি জিলাত পাকিস্তানৰ পৰা অহা সন্ত্ৰাসবাদীয়ে সেনা, স্থানীয় আৰক্ষী আৰু সাধাৰণ নাগৰিকক আক্ৰমণৰ লক্ষ্য কৰি আহিছে।
