প্ৰথমে বিকট শব্দ, ছিগিল ৰে’ললাইন, খাৱৈত সোমাল ইঞ্জিন! মৃত্যুৰ মুখৰ পৰা কথমপি প্ৰাণ ৰক্ষা যাত্ৰীৰ, ডিগাৰুত কেনেকৈ ঘটিল ভয়ংকৰ ৰে’ল দুৰ্ঘটনা?

পুৱাই হঠাৎ বিকট শব্দ! তাৰ পিছতে চাৰিওফালে হাহাকাৰ। মুহূৰ্তৰ ভিতৰতে সলনি হৈ পৰিল যাত্ৰীসকলৰ এক সাধাৰণ ৰে’লযাত্ৰা। কোনোবাই প্ৰাণ বচাবলৈ দৌৰিছে, কোনোবাই আকৌ আপোনজনক বিচাৰি চিঞৰিছে। গুৱাহাটীৰ সমীপৰ ডিগাৰুত সংঘটিত হ’ল এক ভয়ংকৰ ৰে’ল দুৰ্ঘটনা।

মিজোৰামৰ চাইৰাঙৰ পৰা কলকাতামুখী কলকাতা-চাইৰাং এক্সপ্ৰেছ দুৰ্ঘটনাত পতিত হোৱাৰ পিছতে পোহৰলৈ আহিছে শিহৰণকাৰী দৃশ্য। প্ৰাৰম্ভিক তথ্য অনুসৰি, ৰে’লখনৰ ব্ৰেক চিষ্টেম বিকল হোৱাৰ ফলতে এই দুৰ্ঘটনা সংঘটিত হোৱা বুলি জানিব পৰা গৈছে। দুৰ্ঘটনাত ইঞ্জিনসহ সাতটাকৈ ডবা লাইনচ্যুত হোৱা বুলি প্ৰকাশ পাইছে।

প্ৰত্যক্ষদৰ্শীৰ ভাষ্যই আৰু অধিক ভয়ংকৰ কৰি তুলিছে ঘটনাৰ বৰ্ণনা। ৰে’লখন এটা ব্যৱহাৰ নকৰা ট্ৰেকত সোমাই পৰাৰ সময়তে যাত্ৰীসকলে শুনিবলৈ পাইছিল এটা প্ৰচণ্ড শব্দ। তাৰ পিছতে লাইনচ্যুত হয় ইঞ্জিন। প্ৰত্যক্ষদৰ্শীৰ দাবী অনুসৰি, প্ৰায় ১০ মিনিট ধৰি ট্ৰেকৰ পৰা নামি চুচৰি গৈ অৱশেষত এটা খাৱৈত সোমাই পৰে ৰে’লৰ ইঞ্জিন।

দুৰ্ঘটনাৰ পিছতে ঘটনাস্থলীত সৃষ্টি হয় হাহাকাৰ পৰিস্থিতি। প্ৰাৰম্ভিক তথ্য অনুসৰি, ৩০ৰো অধিক যাত্ৰী আহত হৈছে। আহতসকলক ততাতৈয়াকৈ চিকিৎসালয়লৈ প্ৰেৰণ কৰা হৈছে। ঘটনাস্থলীলৈ ৰাওনা হৈছে উদ্ধাৰকাৰী দল।

কিন্তু প্ৰকৃততে কিয় বিকল হ’ল ৰে’লখনৰ ব্ৰেক চিষ্টেম? কিদৰে এটা ব্যৱহাৰ নকৰা ট্ৰেকত সোমাই পৰিল যাত্ৰীবাহী ৰে’লখন? কাৰিকৰী বিজুতি নে আন কিবা কাৰণ? এই ভয়ংকৰ দুৰ্ঘটনাৰ প্ৰকৃত কাৰণ জানিবলৈ এতিয়া অপেক্ষা তদন্তৰ প্ৰতিবেদনৰ।