‘পাকিস্তানৰ নাম…’, পেহেলগাম কাণ্ডক লৈ প্ৰতিক্ৰিয়া শ্বাহিদ আফ্ৰিদীৰ
জম্মু-কাশ্মীৰৰ পেহেলগামত সংঘটিত সন্ত্ৰাসবাদী আক্ৰমণৰ ঘটনা সন্দৰ্ভত প্ৰথমবাৰৰ বাবে প্ৰতিক্ৰিয়া প্ৰকাশ কৰিছে পাকিস্তানৰ প্ৰাক্তন অধিনায়ক শ্বাহিদ আফ্ৰিদীয়ে। এই নৃশংস ঘটনাক লৈ দুখ প্ৰকাশ কৰিছে যদিও প্ৰাক্তন ক্ৰিকেটাৰগৰাকীয়ে ভাৰতক লৈ কিছু আপত্তিও কৰা পৰিলক্ষিত হয়।
তেওঁ কয়, ‘ক্ৰিকেট, ক্ৰীড়া আৰু ক্ৰীড়া কূটনীতিৰ প্ৰতি মোৰ দৃঢ় বিশ্বাস আছে। ইয়াৰ কোনো ৰাজনৈতিক দৃষ্টিকোণ থাকিব নালাগে। আমি চুবুৰীয়া দেশ, আমি ইজনে সিজনৰ যত্ন লোৱা উচিত। কিন্তু এপিছোড আৰম্ভ নোহোৱাতেই আপোনালোকে প্ৰত্যক্ষভাৱে পাকিস্তানৰ নাম লৈছে। অন্ততঃ প্ৰমাণ লৈ আহক, বিশ্ববাসীক জনাওক।’
তেওঁ লগতে কয় যে আমি যি ধৰ্মৰে নহওঁ কিয়, আমি সন্ত্ৰাসবাদক সমৰ্থন নকৰো। এজন মানুহ হিচাপে, এজন নিৰীহ মানুহ হিচাপে তাত যি ঘটিল সেয়া অতি দুখজনক। এনেবোৰ কথা হ’ব নালাগে। দুয়োখন চুবুৰীয়া দেশ। মই ভাবো আমাৰ মাজৰ সম্পৰ্ক ভাল হ’ব লাগে। যুদ্ধৰ কোনো লাভালাভ নাই।
উল্লেখ্য যে, পেহেলগামত সংঘটিত সন্ত্ৰাসবাদী আক্ৰমণৰ পিছত ভাৰত আৰু পাকিস্তানৰ মাজত উত্তেজনা যথেষ্ট বৃদ্ধি পাইছে। চুবুৰীয়া দেশৰ বিৰুদ্ধে অতি কঠোৰ পদক্ষেপ গ্ৰহণ কৰিছে প্ৰধানমন্ত্ৰী মোদীয়ে।
এই নৃশংস ঘটনাৰ পিছতে ভাৰতৰ তৰফৰ পৰা পাকিস্তানৰ সীমান্ত বন্ধ কৰি দিয়া হৈছে। কেৱল এয়াই নহয়, ভাৰতত উপস্থিত থকা সকলো পাকিস্তানী নাগৰিককে নিজৰ দেশলৈ উভতি যাবলৈ নিৰ্দেশ দিয়া হৈছে। তদুপৰি সিন্ধু জল চুক্তিও বাতিল কৰিছে ভাৰতে।
