উদ্যোগ আৰু অৰ্থনৈতিক বিকাশৰ ক্ষেত্ৰত নতুন সংযোজন হিচাপে নলবাৰীত পেপছিকো ইণ্ডিয়াৰ অত্যাধুনিক খাদ্য প্ৰক্ৰিয়াকৰণ প্ৰকল্পই আনুষ্ঠানিকভাৱে যাত্ৰা আৰম্ভ কৰিছে। ২০২৩ চনতেই এই প্ৰকল্পৰ ভূমি পূজন সম্পন্ন কৰা হৈছিল। প্ৰতিশ্ৰুতি অনুসৰি নিৰ্ধাৰিত সময়ৰ ভিতৰত প্ৰকল্পটো সম্পূৰ্ণ কৰি আজি ইয়াৰ শুভ উদ্বোধন কৰে মুখ্যমন্ত্ৰী ড০ হিমন্ত বিশ্ব শৰ্মাই।
এই উপলক্ষে মুখ্যমন্ত্ৰীয়ে কয় যে- ২০২৩ চনতেই নলবাৰীত পেপছিকো ইণ্ডিয়াৰ এই বৃহৎ প্ৰকল্পৰ ভূমি পূজন কৰাৰ সুযোগ লাভ কৰিছিল। সেই সময়ত গ্ৰহণ কৰা লক্ষ্য আৰু প্ৰতিশ্ৰুতি বাস্তৱায়িত কৰি আজি প্ৰকল্পটোৰ শুভ উদ্বোধন কৰিবলৈ সক্ষম হোৱা বুলি তেওঁ উল্লেখ কৰে।
মুখ্যমন্ত্ৰীৰ মতে, অসমৰ বাবে এই প্ৰকল্প কেৱল এক উদ্যোগ স্থাপনৰ বিষয় নহয়; ইয়াৰ সৈতে ৰাজ্যখনৰ কৃষি, খাদ্য প্ৰক্ৰিয়াকৰণ, নিয়োগ আৰু স্থানীয় অৰ্থনীতিৰো গভীৰ সম্পৰ্ক আছে। বিশেষকৈ কৃষিজাত সামগ্ৰীৰ মূল্য সংযোজনৰ ক্ষেত্ৰত এনে উদ্যোগে কৃষক আৰু উদ্যোগীসকলৰ বাবে নতুন সুযোগ সৃষ্টি কৰিব পাৰে।
নলবাৰীত স্থাপিত এই অত্যাধুনিক খাদ্য প্ৰক্ৰিয়াকৰণ প্ৰকল্পই অসমৰ উদ্যোগ খণ্ডলৈ নতুন বিনিয়োগ আকৰ্ষণ কৰাৰ লগতে ৰাজ্যখনক খাদ্য প্ৰক্ৰিয়াকৰণৰ এক গুৰুত্বপূৰ্ণ কেন্দ্ৰ হিচাপে গঢ়ি তোলাৰ সম্ভাৱনা বহন কৰিছে। স্থানীয়ভাৱে উৎপাদিত কেঁচামালৰ ব্যৱহাৰ বৃদ্ধি পালে কৃষকসকলেও ইয়াৰ পৰা পৰোক্ষভাৱে লাভান্বিত হোৱাৰ আশা কৰা হৈছে।
ইয়াৰ উপৰি বৃহৎ উদ্যোগ স্থাপনৰ ফলত স্থানীয় যুৱক-যুৱতীৰ বাবে প্ৰত্যক্ষ আৰু পৰোক্ষ নিয়োগৰ সুযোগ সৃষ্টি হোৱাৰ সম্ভাৱনা আছে। পৰিবহণ, যোগান, পেকেজিং, সেৱা আৰু অন্যান্য আনুষংগিক ক্ষেত্ৰতো নতুন ব্যৱসায়িক সুযোগ মুকলি হ’ব পাৰে।
মুখ্যমন্ত্ৰীয়ে প্ৰকল্পটোৰ ভৱিষ্যৎ সম্ভাৱনাৰ কথা উল্লেখ কৰি কয় যে- এই প্ৰকল্পক ইয়াক কেৱল এক সফল উদ্যোগ হিচাপে নহয়, বিশ্বমুখী এক বৃহৎ উদ্যোগলৈ ৰূপান্তৰিত কৰাৰ দায়িত্ব সকলোৰে। ইয়াৰ বাবে চৰকাৰৰ লগতে স্থানীয় ৰাইজ, কৃষক, উদ্যোগী আৰু সংশ্লিষ্ট সকলো পক্ষৰ সম্পূৰ্ণ সহযোগিতা প্ৰয়োজন।
নলবাৰীৰ মাটিত আৰম্ভ হোৱা এই প্ৰকল্পই আগন্তুক দিনত অসমৰ খাদ্য প্ৰক্ৰিয়াকৰণ উদ্যোগক অধিক শক্তিশালী কৰাৰ লগতে ৰাজ্যখনৰ অৰ্থনৈতিক বিকাশৰ নতুন দুৱাৰ মুকলি কৰিব বুলি আশা কৰা হৈছে।
