বন্ধ হৈ পৰিব ফেচবুক, ইনষ্টাগ্ৰাম! ১৮ বছৰৰ তলৰ কিশোৰ-কিশোৰীৰ বাবে নিষিদ্ধ নেকি ছ’চিয়েল মিডিয়া?

১৮ বছৰৰ তলৰ লোকৰ ছ’চিয়েল মিডিয়া ব্যৱহাৰ সম্পূৰ্ণৰূপে নিষিদ্ধ কৰাৰ পৰিকল্পনা কৰিছে কেন্দ্ৰীয় চৰকাৰে। ২৮ ছেপ্টেম্বৰত মুখ্য ন্যায়াধীশ সূৰ্য কান্তৰ নেতৃত্বত ন্যায়াধীশ জয়মল্য বাগচি আৰু ভি মোহানাক লৈ গঠিত বিচাৰপীঠে Just Rights for Children Alliance-এ দাখিল কৰা আবেদনখনৰ শুনানি গ্ৰহণ কৰে।

আবেদনখনত ছ’চিয়েল মিডিয়া আৰু অন্যান্য ডিজিটেল প্লেটফৰ্মৰ সম্ভাব্য বিপদৰ পৰা শিশুসকলক সুৰক্ষা দিয়াৰ বাবে অধিক ব্যৱস্থা গ্ৰহণৰ দাবী জনোৱা হৈছিল।

অৱশ্যে সম্পূৰ্ণৰূপে নিষিদ্ধ কৰাৰ দাবীক ভুৱা আৰু ভিত্তিহীন বুলি খাৰিজ কৰিছে চৰকাৰী সূত্ৰই। এই স্পষ্টীকৰণ আহিছে উচ্চতম ন্যায়ালয়ে নাবালকৰ ছ’চিয়েল মিডিয়া ব্যৱহাৰ আৰু সুৰক্ষাৰ বিষয়টোত কেন্দ্ৰক বৰ্তমানৰ নিয়মসমূহ অধিক শক্তিশালী আইনী আন্ত:গাঠনিৰ অধীনলৈ অনাৰ সম্ভাৱনা বিবেচনা কৰিবলৈ কোৱাৰ পিছত।

আদালতে প্ৰশ্ন তোলে- ১৮ বছৰৰ তলৰ নাবালকে যদি ভাৰতীয় চুক্তি আইনৰ অধীনত স্বতন্ত্ৰভাৱে বাধ্যতামূলক চুক্তি কৰিব নোৱাৰে, তেন্তে ছ’চিয়েল মিডিয়া প্লেটফৰ্মৰ ‘Terms of Service’ গ্ৰহণ কৰি নিজৰ নামত একাউণ্ট কেনেকৈ খুলিব পাৰে? আবেদনকাৰী সংস্থাটোৱে নাবালকৰ একাউণ্ট খোলাৰ পূৰ্বে পিতৃ-মাতৃ বা আইনী অভিভাৱকৰ সন্মতিৰ ব্যৱস্থা কৰাৰ দাবী কৰিছে।

অৱশ্যে বৰ্তমানলৈ ভাৰতত ১৮ বছৰৰ তলৰ সকলোৰে ছ’চিয়েল মিডিয়া ব্যৱহাৰ নিষিদ্ধ কৰা কোনো কেন্দ্ৰীয় আইন ঘোষণা হোৱা নাই। সেয়ে চৰকাৰৰ শেহতীয়া স্পষ্টীকৰণে ‘১৮ বছৰৰ তলৰ লোকৰ ছ’চিয়েল মিডিয়া নিষেধ’ৰ দাবীটোক লৈ চলি থকা জল্পনা-কল্পনাত আপাতত ইতি পেলাইছে।