নেপালত প্ৰকৃতিয়ে ধাৰণ কৰিছে বিধ্বংসী ৰূপ। ৰাছুৱা আৰু কৈলাশ মনসৰোবৰলৈ যোৱা ৪০০ ৰো অধিক তীৰ্থযাত্ৰী নিৰুদ্দেশ হোৱা বুলি জানিব পৰা গৈছে। নিৰুদ্দেশ হোৱা এই তীৰ্থযাত্ৰীসকলৰ ভিতৰত অধিকাংশই ভাৰতীয় তীৰ্থযাত্ৰী।
২৬ আগষ্টৰ পুৱা নেপালত হোৱা ক্ষন্তেকীয়া বানপানীয়ে ঘণ্টাৰ ভিতৰতে ৰাছুৱা, নুৱাকোট, ধাডিং, আৰু চিতৱানত ব্যাপক ক্ষতিসাধন কৰে। কেইবাখনো দলং ধ্বংস হোৱাৰ লগতে বিদ্যুৎ পৰিবাহী তাঁৰ ক্ষতিগ্ৰস্ত হয়। তিব্বত সীমান্তৰ ওচৰৰ লেণ্ডে নদীৰ ওপৰৰ অংশৰ পৰা বানপানীৰ উৎপত্তি হোৱা বুলি অনুমান কৰা হৈছে।
ৰাছুৱা আৰু কৈলাশ মনসৰোবৰলৈ যোৱা ৪০০ ৰো অধিক তীৰ্থযাত্ৰী নিৰুদ্দেশ হোৱা বুলি জানিব পৰা গৈছে। নিৰুদ্দেশ হোৱা এই তীৰ্থযাত্ৰীসকলৰ ভিতৰত অধিকাংশই ভাৰতীয় তীৰ্থযাত্ৰী।
৩২জন নেপাল আৰক্ষী আৰু ৯জন সশস্ত্ৰ আৰক্ষীকে ধৰি মুঠ ৪১জন নিৰাপত্তাৰক্ষীও সন্ধানহীন হৈ আছে। প্ৰাৰম্ভিক খবৰ অনুসৰি পুৱা ৯ বজাৰ ওচৰত ভোটে কোছি নদীৰ বানপানীৰ পানী দ্ৰুতগতিত বৃদ্ধি পায়। নেপাল সেনাই এক বিবৃতিত কয় যে, হঠাতে পানী বৃদ্ধি পোৱাৰ ফলত ৰাছুৱা জিলাৰ টাইমুৰে আৰু ইয়াৰ ওচৰৰ ছায়াফ্ৰুবেছি অঞ্চলত ব্যাপক ধ্বংসলীলা চলি যান-বাহন, সামগ্ৰী আৰু অন্যান্য সা-সম্পত্তি উটুৱাই লৈ যায়। কাঠমাণ্ডুৰ পৰা প্ৰায় ১২৫ কিলোমিটাৰ উত্তৰ-পূবে তিব্বত সীমান্তৰ সমীপত অৱস্থিত ৰাছুৱা জিলা। টাইমুৰে, ছ্যাফ্ৰুবেছি, ৰাছুৱাগাঢ়ী, আৰু মাইলুঙৰ আৰক্ষী কাৰ্যালয়ৰ ক্ষতিসাধন হয়। আন কেইবাখনো জিলাত হাই এলাৰ্টত জাৰি কৰা হয়।
নেপালৰ ৰাষ্ট্ৰীয় দুৰ্যোগ আশংকা হ্ৰাস আৰু ব্যৱস্থাপনা কৰ্তৃপক্ষই এক বিবৃতি প্ৰকাশ কৰি ৰাছুৱা, নুৱাকোট, ধাডিং, চিতৱান, আৰু গোৰ্খাত নদীৰ পাৰত বাস কৰা বাসিন্দাসকলক উচ্চ সতৰ্কতা অৱলম্বন কৰি পৰৱৰ্তী জাননী নিদিয়ালৈকে সুৰক্ষা ব্যৱস্থা গ্ৰহণ কৰিবলৈ আহ্বান জনাইছে।
নেপালৰ এই বানপানীক লৈ ভাৰতৰ উদ্বেগ বাঢ়িছে কাৰণ ক্ষতিগ্ৰস্ত নদী ব্যৱস্থাই পাছলৈ ভাৰতত গণ্ডক নদী গঠন কৰে। এই নদীখনক বাল্মিকীনগৰৰ সমীপত ভাৰত পোৱাৰ পিছত গণ্ডক বুলি কোৱা হয়। ত্ৰিশুলী নৈয়ে দেৱঘাটত গণ্ডকৰ লগত মিলি নাৰায়ণী নদী গঠন কৰে। এই কাৰণতে ভাৰতীয় সংস্থাসমূহে গণ্ডকৰ জলস্তৰ নিৰীক্ষণ কৰি আছে। কেন্দ্ৰীয় জল আয়োগে বিহাৰ আৰু উত্তৰ প্ৰদেশৰ গণ্ডকৰ কাষৰীয়া অঞ্চলসমূহক সজাগ হৈ থাকিবলৈ পৰামৰ্শ দিছে।
বিহাৰৰ পশ্চিম চম্পাৰণ, পূব চম্পাৰণ, গোপালগঞ্জ, সাৰণ, মুজাফ্ফৰপুৰ আৰু বৈশালীত বানপানীৰ সম্ভাৱ্য প্ৰভাৱৰ ওপৰত নজৰ ৰখা হৈছে। পশ্চিম চম্পাৰাণ হৈছে ভাৰতৰ প্ৰথমখন ডাঙৰ জিলা যিখন বানপানীৰ সমতলত অৱস্থিত। বেটিয়া, গোপালগঞ্জ, আৰু মুজাফ্ফৰপুৰত এন ডি আৰ এফৰ দল মোতায়েন কৰা হৈছে। দুৰ্বল অঞ্চলতো এছডিআৰএফৰ দল উপস্থিত থাকে।
উত্তৰ প্ৰদেশৰ মহাৰাজগঞ্জ আৰু কুছিনগৰ জিলাতো গণ্ডকৰ জলপৃষ্ঠ বৃদ্ধি পোৱাৰ সম্ভাৱনাৰ বাবে সতৰ্কতা অৱলম্বন কৰা হৈছে। গণ্ডক আৰু হাজীপুৰ আৰু সোণপুৰৰ ওচৰত গংগাৰ লগত মিলি যায়। কিন্তু পাহাৰীয়া অঞ্চলৰ পৰা পানী বৈ যোৱাৰ লগে লগে নদীখনৰ প্ৰস্থ বাঢ়ি যায় আৰু ইয়াৰ প্ৰবাহৰ গতি কমি যোৱাৰ সম্ভাৱনা থাকে।
কোছি, বাগমতী, বুঢ়ী গণ্ডক, ঘঘৰা নদীবোৰে বিভিন্ন পথ অনুসৰণ কৰে। যাৰ বাবে নেপালৰ পৰা অহা বানপানীৰ পানী পোনপটীয়াকৈ এই নদীবোৰলৈ নাযায়। বৰ্তমান ইয়াৰ সম্ভাৱ্য প্ৰভাৱ মূলতঃ গণ্ডক নদীৰ গতিপথৰ কাষৰীয়া অঞ্চলসমূহত সীমাৱদ্ধ হৈ থকাৰ সম্ভাৱনা আছে।
ভাৰতত আটাইতকৈ নিবিড়ভাৱে নিৰীক্ষণ কৰা ষ্ট্ৰেচটো হৈছে- নাৰায়ণীৰ পৰা বাল্মিকীনগৰলৈকে আৰু তাৰ পৰা গণ্ডক হৈ উত্তৰ বিহাৰলৈকে। নেপালৰ হঠাৎ বানপানীৰ সঠিক কাৰণ তদন্ত সম্পূৰ্ণ হোৱাৰ পিছতহে স্পষ্ট হ’ব, কিন্তু ভাৰতলৈ পানী পোৱাৰ পথটো স্পষ্ট: নেপালৰ পৰা নাৰায়ণীলৈ, নাৰায়ণৰ পৰা গণ্ডকলৈ, তাৰ পিছত গংগালৈ।
আজি কাঠমাণ্ডুত থকা ভাৰতীয় দূতাবাসে নেপালত হোৱা ক্ষন্তেকীয়া বানপানীৰ ফলত ক্ষতিগ্ৰস্ত ভাৰতীয় নাগৰিক সন্দৰ্ভত সাহায্য আৰু তথ্যৰ বাবে জৰুৰীকালীন নম্বৰ জাৰি কৰে। দূতাবাসে জনোৱা মতে, সহায়ৰ প্ৰয়োজন হোৱা লোকসকলে হেল্পলাইন +৯৭৭ ৯৮৫ ১৩১ ৬৮০৭ আৰু +৯৭৭ ৯৭০ ৯১০ ৭৫০০ত দূতাবাসৰ সৈতে যোগাযোগ কৰিব পাৰিব।
