শান্ত সাগৰৰ বুকুত হঠাৎ প্ৰকৃতিৰ প্ৰচণ্ড জোকাৰণি। সমুদ্ৰৰ গভীৰতাত সৃষ্টি হোৱা শক্তিশালী ভূমিকম্পই এতিয়া কঢ়িয়াই আনিছে চুনামীৰ আশংকা। দক্ষিণ প্ৰশান্ত মহাসাগৰৰ ভানুআটু দ্বীপপুঞ্জৰ সমীপত সংঘটিত ৭.২ প্ৰাবল্যৰ ভূমিকম্পৰ পিছতে উপকূলীয় অঞ্চলসমূহত সৃষ্টি হৈছে উদ্বেগ। ২৪ অক্টোবৰত সংঘটিত এই প্ৰাকৃতিক ঘটনাক লৈ সতৰ্ক হৈ পৰিছে নিৰীক্ষণকাৰী সংস্থাসমূহ।
আমেৰিকাৰ ভূতাত্ত্বিক জৰীপ সংস্থাৰ প্ৰাৰম্ভিক তথ্য অনুসৰি, সাগৰৰ তলত প্ৰায় ১০ কিলোমিটাৰ গভীৰতাত আছিল ভূমিকম্পটোৰ কেন্দ্ৰবিন্দু। ভানুআটুৰ ৰাজধানী প’ৰ্ট ভিলাৰ পৰা প্ৰায় ২০০ কিলোমিটাৰ পশ্চিমে সংঘটিত হয় এই কম্পন।
কিন্তু ইয়াতেই শেষ হোৱা নাই ৰহস্যৰ। প্ৰাৰম্ভিক নিৰীক্ষণত ৬.৯ প্ৰাবল্যৰ আন এটা ৰিডিঙো ধৰা পৰে। এই ৰিডিং প্ৰথমটোৰ প্ৰায় ২৫ ছেকেণ্ড পিছত নথিভুক্ত কৰা হৈছিল। সেয়া পৃথক ভূমিকম্প আছিল নে একেটা ঘটনাৰ প্ৰাবল্য নিৰ্ধাৰণৰ পাৰ্থক্য, সেয়া এতিয়াও স্পষ্ট হোৱা নাই।
ইফালে, প্ৰশান্ত মহাসাগৰীয় চুনামী সতৰ্কবাণী কেন্দ্ৰই ভূমিকম্পৰ কেন্দ্ৰৰ পৰা ৩০০ কিলোমিটাৰৰ ভিতৰত থকা উপকূলীয় অঞ্চলসমূহৰ বাবে বিপজ্জনক সাগৰীয় ঢৌৰ সম্ভাৱনাৰ সতৰ্কবাণী জাৰি কৰিছে।
উল্লেখযোগ্য যে, সাগৰৰ তলত সংঘটিত শক্তিশালী ভূমিকম্পই কেতিয়াবা বিশাল ঢৌৰ সৃষ্টি কৰি উপকূলীয় জনজীৱনলৈ বিপদ নমাই আনিব পাৰে। অৱশ্যে, সতৰ্কবাণী জাৰি হোৱাটোৱেই চুনামী নিশ্চিতভাৱে আহিব বুলি নুবুজায়।
এতিয়া সকলোৰে দৃষ্টি প্ৰশান্ত মহাসাগৰৰ বুকুলৈ। প্ৰকৃতিৰ এই জোকাৰণিয়ে কেৱল ভূমিকম্পৰ আশংকাই কঢ়িয়াই আনিছে, নে ইয়াৰ পিছত আহিব পাৰে অধিক বিপজ্জনক ঢৌ- সেই প্ৰশ্নই সৃষ্টি কৰিছে উদ্বেগ।
