২০২৩ চনৰ ৭ অক্টোবৰত ইজৰাইলৰ ওপৰত হামাছে চলোৱা আক্ৰমণক লৈ পুনৰ এক চাঞ্চল্যকৰ দাবী পোহৰলৈ আহিছে। ইজৰাইলী সংবাদপত্ৰত প্ৰকাশিত এক প্ৰতিবেদন অনুসৰি, আক্ৰমণৰ প্ৰায় ১০ দিন পূৰ্বে সংযুক্ত আৰব আমিৰশ্বাহীৰ ৰাষ্ট্ৰপতি শ্বেইখ মহম্মদ বিন জায়েদ আল নাহিয়ানে ব্যক্তিগতভাৱে ইজৰাইলৰ প্ৰধানমন্ত্ৰী বেঞ্জামিন নেতান্য়ায়াহুক ফোন কৰি হামাছে বৃহৎ সামৰিক অভিযান চলাবলৈ প্ৰস্তুতি চলোৱাৰ বিষয়ে সতৰ্ক কৰি দিছিল।
প্ৰতিবেদন অনুসৰি, ২০২৩ চনৰ ছেপ্টেম্বৰৰ শেষৰ ফালে দুয়োগৰাকী নেতাৰ মাজত প্ৰায় ৪৫ মিনিট ধৰি ফোনত কথা-বতৰা হৈছিল। সেই আলোচনাৰ সময়ত UAE ৰাষ্ট্ৰপতিয়ে তেতিয়াৰ হামাছ নেতা ইয়াহিয়া সিনৱাৰৰ নেতৃত্বত ইজৰাইলৰ বিৰুদ্ধে বৃহৎ আক্ৰমণৰ প্ৰস্তুতি চলি থকাৰ তথ্য নেতান্য়ায়াহুক জনাইছিল বুলি দাবী কৰা হৈছে। এই আক্ৰমণ সংঘটিত হ’লে ব্যাপক ৰক্তপাতৰ লগতে সমগ্ৰ মধ্যপ্ৰাচ্যৰ শান্তি প্ৰক্ৰিয়াত গুৰুতৰ প্ৰভাৱ পৰিব পাৰে বুলিও UAE ৰাষ্ট্ৰপতিয়ে আশংকা প্ৰকাশ কৰা বুলি প্ৰতিবেদনটোত উল্লেখ কৰা হৈছে।
প্ৰতিবেদনৰ মতে, এই ফোন বাৰ্তালাপৰ বিষয়ে তিনিজন জ্যেষ্ঠ বিদেশী বিষয়াকো অৱগত কৰা হৈছিল। প্ৰতিবেদনটোৰ তথ্যৰ এটা গুৰুত্বপূৰ্ণ উৎস হিচাপে UAE ৰাষ্ট্ৰপতিৰ কিন্তু এই সতৰ্কবাণীৰ প্ৰতি নেতান্য়ায়াহুৰ সঁহাৰি যথেষ্ট শান্ত আছিল বুলি প্ৰতিবেদনটোত দাবী কৰা হৈছে। নেতান্য়ায়াহুৱে UAE ৰাষ্ট্ৰপতিক ইজৰাইলে গাজাৰ পৰিস্থিতি অতি ঘনিষ্ঠভাৱে নিৰীক্ষণ কৰি থকাৰ কথা জনাইছিল বুলি কোৱা হৈছে। লগতে হামাছে যদি কোনো সামৰিক পদক্ষেপ গ্ৰহণ কৰে, তেন্তে সেয়া গাজাৰ পৰিৱৰ্তে পশ্চিম পাৰক কেন্দ্ৰ কৰি হোৱাৰ সম্ভাৱনা অধিক বুলি নেতানিয়াহুৱে মন্তব্য কৰা বুলি প্ৰতিবেদনত উল্লেখ কৰা হৈছে।
ইজৰাইল যিকোনো পৰিস্থিতিৰ সৈতে মোকাবিলা কৰিবলৈ সাজু বুলিও নেতানিয়াহুৱে আশ্বাস দিছিল বুলি দাবী কৰা হৈছে। কিন্তু ইয়াৰ মাত্ৰ প্ৰায় ১০ দিন পিছতেই ৭ অক্টোবৰত হামাছে ইজৰাইলৰ ওপৰত আকস্মিক আৰু বৃহৎ আক্ৰমণ চলায়। আক্ৰমণত বহু ইজৰাইলী লোকৰ মৃত্যু হোৱাৰ লগতে বহু লোকক পণবন্দী কৰি গাজালৈ লৈ যোৱা হয়। ইয়াৰ পিছতে ইজৰাইলে গাজাত বৃহৎ সামৰিক অভিযান আৰম্ভ কৰে আৰু সংঘাতটোৱে এক ব্যাপক যুদ্ধৰ ৰূপ লয়।
হামাছৰ সম্ভাৱ্য আক্ৰমণৰ বিষয়ে UAE ৰাষ্ট্ৰপতিয়ে কেনেকৈ তথ্য লাভ কৰিছিল, সেই সন্দৰ্ভতো প্ৰতিবেদনত দাবী কৰা হৈছে যে ইয়াহিয়া সিনৱাৰৰ পৰা অহা তথ্যৰ ভিত্তিত UAE নেতৃত্বই এই আশংকাৰ বিষয়ে অৱগত হৈছিল। এই প্ৰতিবেদনখন সাংবাদিক শ্লোমি এলডাৰ আৰু ৰুথ ইউভালৰ এখন নতুন কিতাপৰ আধাৰত প্ৰস্তুত কৰা হৈছে। কিতাপখনৰ বাবে কেইবাজনো উচ্চপদস্থ বিষয়াকে ধৰি কেইবা ডজন ব্যক্তিৰ সাক্ষাৎকাৰ লোৱা হৈছিল বুলি জানিব পৰা গৈছে।
যদিহে এই দাবীসমূহ সঠিক হয়, তেন্তে ৭ অক্টোবৰৰ আক্ৰমণৰ পূৰ্বে ইজৰাইলৰ ওচৰলৈ সম্ভাব্য আক্ৰমণৰ বিষয়ে সতৰ্কবাণী আহিছিল নেকি আৰু সেই তথ্যক নিৰাপত্তা সংস্থাসমূহে কিমান গুৰুত্বসহকাৰে লৈছিল—এই প্ৰশ্নসমূহ পুনৰ গুৰুত্বসহকাৰে উত্থাপিত হ’ব।
