ৰাতিপুৱা টোপনিৰ পৰা উঠি প্ৰথমটো খোজ দিয়াৰ লগে লগে গোৰোহাত বিন্ধি যোৱাৰ দৰে বিষ অনুভৱ কৰে নেকি? কেইখোজমান খোজ কঢ়াৰ পিছত বিষ কমি যায়, কিন্তু বহু সময় থিয় হৈ থাকিলে পুনৰ আৰম্ভ হয়? তেন্তে এই সমস্যাক সাধাৰণ ভাগৰ বুলি আওকাণ নকৰিব। ইয়াৰ আঁৰত থাকিব পাৰে ভৰিৰ এক বিশেষ সমস্যা, যাক চিকিৎসা বিজ্ঞানত প্লাণ্টাৰ ফেচিয়াটিছ বুলি কোৱা হয়।
১. প্লাণ্টাৰ ফেচিয়াটিছ হ’ব পাৰে মূল কাৰণ
ভৰিৰ তলুৱাত থকা প্লাণ্টাৰ ফেচিয়া নামৰ শক্তিশালী কলাডালে গোৰোহাৰ হাড়ক ভৰিৰ আঙুলিৰ সৈতে সংযোগ কৰে। ইয়াত অত্যধিক চাপ পৰিলে বিষ আৰু জঠৰতা সৃষ্টি হ’ব পাৰে। বিশেষকৈ ৰাতিপুৱাৰ প্ৰথম খোজত গোৰোহাত তীব্ৰ বিষ অনুভৱ কৰাটো ইয়াৰ অন্যতম লক্ষণ।
২. ভুল জোতা পিন্ধা
কুশ্বনিং আৰু ভৰিৰ বাবে প্ৰয়োজনীয় সমৰ্থন নথকা জোতা বা চেণ্ডেল পিন্ধিলে তলুৱাত চাপ বৃদ্ধি পাব পাৰে। সেয়ে আৰামদায়ক আৰু উপযুক্ত সমৰ্থন থকা জোতা বাছনি কৰক।
৩. দীৰ্ঘ সময় থিয় হৈ থকা
একেটা ঠাইতে বহু সময় থিয় হৈ থকা বা কঠিন মজিয়াত দীঘলীয়া সময় খোজ কঢ়াৰ ফলতো ভৰিৰ তলুৱাত বিষ হ’ব পাৰে।
৪. ওজন বৃদ্ধি আৰু হঠাৎ ব্যায়াম
শৰীৰৰ ওজন বৃদ্ধি বা হঠাতে অধিক দৌৰা-দৌৰি আৰু ব্যায়াম আৰম্ভ কৰিলে ভৰিৰ কলাত অতিৰিক্ত চাপ পৰিব পাৰে।
কি কৰিলে সকাহ পাব?
বিচনাৰ পৰা উঠাৰ আগতে ভৰিৰ আঙুলিবোৰ লাহে লাহে নিজৰ ফালে টানি ষ্ট্ৰেচিং কৰিব লাগে। বিষ হোৱা ঠাইত কাপোৰেৰে মেৰিয়াই ১৫–২০ মিনিট বৰফ লগোৱাও সহায়ক হ’ব পাৰে। কঠিন মজিয়াত খালী ভৰিৰে খোজ কঢ়া এৰাই চলিব লাগে।
কেতিয়া সাৱধান হ’ব?
বিষ কেইদিনমানৰ পিছতো নকমিলে, খোজ কাঢ়িবলৈ অসুবিধা হ’লে বা ভৰি ফুলি গ’লে চিকিৎসকৰ পৰামৰ্শ ল’ব লাগে। আঘাতৰ পিছত তীব্ৰ বিষ বা ভৰিত ভৰ দিব নোৱাৰিলে তৎকালীন চিকিৎসা গ্ৰহণ কৰাটো দৰকাৰ।
