বিগ বছ ২০ৰ শেহতীয়া খণ্ডত অধিনায়কত্বৰ কামক লৈ সৃষ্টি হোৱা পৰিস্থিতিয়ে পৰিৱেশ হঠাৎ উত্তপ্ত কৰি তোলে। কাজী তৌকীৰ আৰু ঈছা ৰিখীৰ মাজত তীব্ৰ বাক-বিতণ্ডাৰ সৃষ্টি হোৱাৰ পিছত ঈছা আৱেগিক হৈ পৰে আৰু চকুলো টুকি ভাঙি পৰে। ঈছাই অভিযোগ কৰে যে কাজীয়ে তেওঁৰ সৈতে আক্ৰমণাত্মক আচৰণ কৰিছিল। ঘটনাটোক লৈ বিগ বছ ঘৰৰ আন সদস্যসকলৰ মাজতো আলোচনা আৰম্ভ হয়।
ঈছাৰ আৱেগিক প্ৰতিক্ৰিয়াক লৈ উদিতি সিং আৰু অৰিশ্ফা খানৰ সৈতে হোৱা কথা-বতৰাত নিজৰ মতামত প্ৰকাশ কৰে মাহী বিজে। ঈছাই চিঞৰ-বাখৰ কৰা বুলি উল্লেখ কৰি মাহীয়ে কয় যে, প্ৰতিগৰাকী ব্যক্তিয়েই জীৱনত বিভিন্ন অভিজ্ঞতা আৰু সমস্যাৰ মাজেৰে পাৰ হয়। সেয়েহে কোনো ব্যক্তিৰ বৰ্তমানৰ প্ৰতিক্ৰিয়াক অতীতৰ কোনো ঘটনাৰ সৈতে তৎক্ষণাত সংযোগ কৰাটো উচিত নহয়।
কথা-বতৰাৰ মাজতে মাহী বিজে ঈছাই ব্যৱহাৰ কৰা “ট্ৰমা” আৰু “ফ্ৰিক” আদি শব্দক লৈও উদ্বেগ প্ৰকাশ কৰে। তেওঁৰ মতে, শ্ব’ৰ বাহিৰৰ দৰ্শকে এই শব্দসমূহ নিজৰ ধৰণে ব্যাখ্যা কৰিব পাৰে। ঈছাৰ শেহতীয়া বিবাহ বিচ্ছেদৰ প্ৰসংগ উত্থাপন কৰি মাহী কয় যে, এনে মন্তব্যই অনিচ্ছাকৃতভাৱে তেওঁৰ প্ৰাক্তন স্বামী ৰেপাৰ বাদশ্বাহৰ সৈতে বিষয়টো সংযোগ কৰাৰ সুযোগ সৃষ্টি কৰিব পাৰে।
মাহীৰ মতে, কোনো বক্তব্য প্ৰসংগৰ বাহিৰত উপস্থাপন কৰিলে সেয়া পৰোক্ষ অভিযোগৰ দৰে দেখা যাব পাৰে আৰু সংশ্লিষ্ট ব্যক্তিৰ ভাবমূৰ্তিত প্ৰভাৱ পেলাব পাৰে। তেওঁ কাৰোবাৰ বক্তব্যক সম্পূৰ্ণ প্ৰসংগ নজনাকৈ ব্যাখ্যা কৰাৰ ক্ষেত্ৰত সাৱধান হোৱাৰ পোষকতা কৰে।
ইফালে, এই ঘটনাক লৈ ছ’চিয়েল মিডিয়াতো আলোচনা তীব্ৰ হৈছে। একাংশই ঈছাৰ প্ৰতিক্ৰিয়াক সমৰ্থন কৰাৰ বিপৰীতে আন একাংশই ঘটনাটোৰ পৰিস্থিতি আৰু তীব্ৰতা সন্দৰ্ভত প্ৰশ্ন উত্থাপন কৰিছে। আগন্তুক খণ্ডত এই বিতৰ্কই কি ৰূপ লয়, সেয়া হ’ব লক্ষ্যণীয়।
