ভূটানত গ্লেচিয়াৰ বিস্ফোৰণ! যিকোনো মুহূৰ্ততে জলপ্ৰলয়ৰ আশংকা ধুবুৰীত, নিশাটোৰ ভিতৰতে স্থানান্তৰ ১০ হাজাৰ লোকক…

নিশাৰ অন্ধকাৰত হঠাৎ নামি আহিল পানীৰ প্ৰলয়। পাহাৰৰ বুকু ফালি বৈ আহিল বিশাল জলৰাশি। মুহূৰ্ততে ধ্বংসস্তূপত পৰিণত হ’ল পৰ্যটনস্থলী। এইবাৰ প্ৰকৃতিৰ ভয়ংকৰ ৰূপ দেখিলে চুবুৰীয়া ৰাষ্ট্ৰ ভূটানে। ভূটানৰ পৰা নামি অহা বানৰ ঢলে এতিয়া ভাৰতৰ নামনি অসম আৰু পশ্চিম বংগলৈ কঢ়িয়াই আনিছে ভয়ংকৰ বিপদৰ আগজাননী।

২৯ অক্টোবৰৰ নিশা ভূটানৰ গাছা জিলাৰ শিন্তাফু হ্ৰদত সংঘটিত হয় গ্লেচিয়াৰ লেক আউটবাৰ্ষ্ট ফ্লাড (GLOF)। হ্ৰদৰ বান্ধ ভাঙি ওলাই অহা প্ৰায় ৭.৪ নিযুত ঘনমিটাৰ পানীয়ে ভয়ংকৰ পৰিস্থিতিৰ সৃষ্টি কৰে। পানীৰ প্ৰচণ্ড সোঁতত উটি যায় ভূটানৰ জনপ্ৰিয় গাছা ছাছু হট স্প্ৰিংছৰ আন্তঃগাঁথনি। ক্ষতিগ্ৰস্ত হয় পথ আৰু জলসিঞ্চন ব্যৱস্থাও। অৱশ্যে বৰ্তমানলৈ কোনো লোকৰ মৃত্যু বা আহত হোৱাৰ খবৰ পোৱা হোৱা নাই।

কিন্তু বিপদৰ আশংকা এতিয়াও আঁতৰা নাই। ভূটানৰ পৰা নামি অহা এই জলৰাশি ম’চু হৈ সংকোশ নদীৰ দিশে আগবাঢ়ে। সংকোশ নদীৰ জলপৃষ্ঠ হঠাৎ বৃদ্ধি পালে অসমৰ ধুবুৰী জিলাতো ভয়ংকৰ বান পৰিস্থিতিৰ সৃষ্টি হ’ব পাৰে।

ভাৰতৰ কেন্দ্ৰীয় জল আয়োগে জাৰি কৰিছে বিশেষ বান সতৰ্কবাণী। পশ্চিম বংগৰ আলিপুৰদুৱাৰ জিলাত ইতিমধ্যে নিশাটোৰ ভিতৰতে ১০ হাজাৰৰো অধিক লোকক নিৰাপদ স্থানলৈ স্থানান্তৰ কৰা হৈছে। আনহাতে, নামনি অসমৰ ধুবুৰীতো প্ৰশাসন সতৰ্ক অৱস্থাত আছে।

এতিয়া প্ৰশাসনৰ তীক্ষ্ণ নজৰ সংকোশ নদীৰ জলপৃষ্ঠৰ ওপৰত। প্ৰশ্ন এটাই—ভূটানৰ পাহাৰৰ পৰা নামি অহা এই জলৰাশিয়ে ধুবুৰীত কিমান ভয়ংকৰ ৰূপ ধাৰণ কৰিব? নে সময়মতে অৱলম্বন কৰা সতৰ্কতাই ৰক্ষা কৰিব হাজাৰ হাজাৰ জীৱন?